اول 10 ايام

اهلا بيكم حبايب بعد مرور 10 ايام من التمرين على العود والمقطوعات والأغاني بدون الاستعانة بالنوتات والحمد لله كدرت اطلع ٣ مقطوعات وهنة مقدمة "كل دة كان ليه" للفنان محمد عبد الوهاب ومقطوعة سنوات الضياع ومجموعة من التقاسيم على أكثر من مقام وكل هذا سماعي يعني اسمع الأغنية أو المقطوعة واجي ع العود واضل اتمرن واعيد واسقل لمدة ٣ ساعات تقريبا لحد ما اطلع الأغنية أو المقطوعة وما استعين بشي فقط اذني والاغنية والعود وكلش متحمس اكمل بعد واطلع مقطوعات وأغاني أكثر والتحدي كلش يسوي واهس واني ممتن لمرتضى ع هذا التحدي اللطيف الخلاني اتفاجئ بروحي وبمستواي وبهذا عودي المفلش واتمرن لحد ما ايدي تكلي كافي تعبت واصابعي تصير زرك لأن الأوتار مرتفعة بس اني مؤمن بأن الإبداع يولد من رحم المعاناة 

وان شاء الله القادم أفضل واحسن واطور بعد واطلع أشياء تخبل بهل كم يوم البقن وحب جبير إلى كل من ساهم بهذا التحدي وكل اخوتي المشتركين والمشتركات وكل الحب والتوفيق للجميع